Police for Abuja confam say dem arrest one man wey them call Shuaibu Alhaji Yushau wey try kill himself.
For statement wey Police Public Relation Officer (PPRO) for Abuja, SP Josephine Adeh, release on Monday, she yarn say na concerned people call police about the young man wey climb high pole wey Aso Radio get for Katampe on Monday morning.
As dem hear the tori, police for Abuja scatter go the place to stop the man from doing himself strong thing.
"With how police talk am well well, the man wey we later know as Shuaibu Alhaji Yushau, no fit kill himself again," she add.
When police ask am why e wan do am, the young man yarn say na because of how things bad for Nigeria now, and how people dey die anyhow.
Im come talk say na for one week e dey eye the pole before e decide climb am.
Source: Prime 9ja Online Pidgin: Man Climb Radio Mast For Abuja Bin Wan Jump, Police Catch Am