Nigeria Prize for Literature don announce 11 book wey dem shortlist for dia 2024 award wey worth $100,000. Dis year na pikini book dem dey find, and dem get plenti plenti book wey reach 163 wey pipo submit.
Na for video wey dem post for NLNG Instagram page wey Akachi Adimora-Ezeigbo, wey be Chairperson for the prize advisory board, and Ahmed Yerima, wey be one of the board member, announce the shortlist.
Nigeria LNG dey sponsor this Nigeria Prize for Literature to find and give credit to people wey sabi write well well. Dem dey rotate the award for four different kind of writing, and since 2004, dem dey give am to pipo wey write better better book for Nigeria.
Some of the book wey dem shortlist na "A Father's Pride" by Ndidi Chiazor-Enenmor, "Bode's Birthday Party" by Akanni Festus Olaniyi, and "Grandma and the Moon's Hidden Secret" by Jumoke Verissimo.
Oda book wey dey there na "Mighty Mite and Golden Jewel" by Henry Akubuiro, "Risi Recycle – The Dustbin Girl" by Temiloluwa Adeshina, "The Children at the IDP Camp" by Olatunbosun Taofeek, and "The Magic Jalabiya" by Ayo Oyeku.
Dem also include "The Road does not End" by Familoni Oluranti Olubunmi, "The Third Side of a Coin" by Hyginus Ekwuazi, "Village Boy" by Anietie Usen, and "Wish Maker" by Uchechukwu Peter Umezurike.
September na im dem go shortlist three books wey go remain, and na October dem for announce the winner. Last year na Obari Gomba win, wey be associate dean of humanities for Uniport, for im play wey e name na "Grit".
Source: Prime 9ja Online Pidgin: 11 Book Dem Go Fight for $100,000 NLNG Prize for Children Book