Di management of University of Benin, UNIBEN, don order say make dem temporarily stop academic activities for Ugbowo campus of di institution because of di burial of vigilante chairman wey di host community wan do for Saturday.
Na Prime 9ja Online report say di institution talk dis one for one statement wey dem date February 9, 2024, wey Professor Clement Ighodaro, Dean of Students Affairs, sign on behalf of di management of di institution.
For di statement wey di institution title “Notice to UNIBEN Students on Security Alerts in Ekosodin Community and its Environ,” Prof. Ighodaro talk say dem kill di vigilante chairman some time ago for Ekosodin community.
“Di alert from di information wey we gather na about di burial ceremony wey go happen dis weekend for di vigilante chairman wey dem kill some time ago for Ekosodin.
“Dem dey advise students make dem finish all activities today, Friday 9th February by 6 pm and make dem go back to dia houses for di community and stay inside house.
“Dem suppose stay inside house di next day, Saturday, until di events of di burial for di community don finish and other people fit waka freely. Dem also dey advise students wey dey campus make dem go back to dia hostels before night for dis period,” na wetin e talk.
E come tell members of di university community say dem go close di institution gate wey dey lead to Ekosodin by 7 pm on Friday and Saturday.
When dem contact am, di Public Relations Officer of di institution, Dr Benedicta Ehanire, confirm di statement.
“Na from di university authority dem bring di notice,” na wetin she talk.
Source: Prime 9ja Online Pidgin: UNIBEN suspend academic activities for burial ceremony