Di Director General tok dis warn as e dey address Corps Members wen e visit NYSC Orientation Camp for Fanisau Dutse, Jigawa State, North-West Nigeria.
E tok say e administration put di security and welfare of Corps Members and NYSC officials as top priority, and dem go continue to do evri evri to make sure say dem dey safe.
E tok say if e dey compulsory make dem travel, dem must obtain permission from NYSC and dem must avoid night travel.
General Ahmed advise say as dem dey travel, once e reach 6pm, make dem stop dia journey and pass di night for either military barracks, NYSC formations, police barracks or any oda safe place.
E also advise Corps Members make dem take dia personal security serious and avoid to dey associate with pipo wey get questionable character.
“Make una dey law-abiding, focus and always follow di rules and regulations wey dey for camp.
Una dey from different socio-cultural backgrounds, make una learn from one another and make friends. Una must tolerate one another because we dey expect high level of discipline from una.
Avoid drugs, cultism, fraud and oda social vices wey fit put una for trouble,” e tok.
General Ahmed also advise say make dem try dey study di needs of dia host communities and carry out projects wey go improve dia standard of living.