Dem bin don detain dis illegal migrants for two months. Among dem na 34 females and six males wey dem detain for di Bir Al-Ghanam detention facility wey dey about 150 miles from Tripoli, di capital city.
"Afta dem discover say most of dem bin dey enta Libya sake of traffickers wey dey promise dem beta life, but dem come turn dem to slaves wey dey do work by force," Ambassador Kabiru Musa, Charge D’Affaires En Titre of di Naija Misin for Libya talk for one statement wey dem release for Abuja on Wednesday.
Mr Musa sey di Naija pipo wey dem don release go continue to get support from di Misin until dem fit carry dem go back Naija.
Im add sey im don advise dem say make dem return house, no follow enta dis kain dangerous journey again, and make dem warn dia pipo for Naija about di dangers wey dey inside illegal migration.
Di envoy still encourage di victims to gree give information about dia traffickers and agents wey dey Naija and Libya so dem fit arrest dem and punish dem for di crime wey dem do against humanity.
"Meanwhile, di mishon go still dey take care of dia needs like food, house, cloth and medical attention until dem fit carry dem go back Naija through di International Organisation for Migration (IOM)," Mr Musa tok.
Di federal goment don see Libya as one of di place wey dem dey use for human trafficking, so dem don dey work with IOM and di Libya authorities to stop dis illegal migration palava.
Di federal goment still promise sey dem go do everything to make sure say no Nigerian dey stranded for Libya, as dem don dey evacuate plenti pipo with di help of IOM to carry dem go back Naija.
(NAN)
Source: Prime 9ja Online Pidgin: Naija Mishon Free 40 Naija Pipo from Libya Detention