Di 56-year-old wey write di exam, score 424 out of 750 total marks, e no reach di score wey dem need to enter any Chinese university.
Mr Liang, wey be self-made millionaire, bin write di exam for di first time for 1983 wen e dey 16 years old and e bin always get ambition to go one big university for China.
E stop to drink alcohol and dedicate 12 hours everyday to read for im lifelong dream; but unfortunately, e no go likely retake di exam next year because of im poor performance for many years.
"If I no dey see hope say I fit improve, no need to do am again. I truly dey work hard everyday," e tell local media for China.
"E hard to tok whether I go continue prepare for di gaokao next year. E hard to take dis decision, I no wan give up at all."
E add, "I fit give up, if I attend am next year, I go give up my last name Liang if I fail."
Millions of Chinese students from different backgrounds dey write di entrance exam every year.
Gaokao na one tough exam wey dey test di intellectual capacity of each candidate and e determine dem life choices like university, job opportunities, marriage, and lifestyle.
Di exam dey focus on Chinese, mathematics, English, and any other science or liberal art course.
For 2021, Chinese goment data show say about 41.6% of candidates enta universities or colleges.
Source: Prime 9ja Online Pidgin: Chinese man don fail gaokao 27 times, doubt im university dream