E yan dis one for im Eid-el-Kabir mesage to Nigerians.
Buhari komot power gi President Bola Tinubu on May 29, 2023, and e kpeme enta im private life after.
For di statement, wey Mallam Garba Shehu, fọma presidential spokesperson, issue on Tuesday, Buhari beg Nigerians make dem support im successor well-well.
"E say make we fulli support di Tinubu Administration make e succeed, becos leadership na tough work wey need di sacrifice and support of di citizens," na so Buhari yan.
Buhari yan dis one 24 hours afta e tok say Tinubu for don fail if e remove fuel subsidy.
For statement wey e release on Monday, Buhari defend im action, e say e no gree remove di subsidy sake of im no wan make All Progressives Congress (APC) lose di February 25 election.
Shehu yan say dem inherit plenty subsidies for 2015 wen Buhari dey power, but before e komot, dem don quench dem.
"Wetin make di new Tinubu/Shettima presidency take weeks to remove di petrol subsidy wey Buhari no remove for years? Wetin happun to di big big subsidies wey dey for electricity, fertiliza, Hajj/Christian Pilgrim and oda things wey we meet for ground? Una remember dem?" na so Shehu yan.
"E add say, di diesel subsidy, aviation fuel subsidy, LPFO, kerosene, cooking gas, and oda subsidy policies wey we meet, we don quench dem. Una remember dem?
"For people wey forget, many of dem subsidies bin dey for ground wen President Buhari enta office for 2015: all of dem don vanish for May 2023 - including di annual fertilizer subsidy wey weigh 60-100 billion Naira (na trillion naira for 10 years - yes, una read am well) wey heavy for di federal budget every year.
"So no, Buhari no remove di petrol subsidy - but for important stages, e don remove evri oda subsidy wey dey bust di budget, wey no make di economy grow," na so Shehu yan.
"E add say, e don refuse to answer di plenty questions wey dem dey ask about di removal of subsidies on Premium Motor Spirit, PMS, and di one wey come from di double rates of Naira for Central Bank and parallel market. Wetin make Buhari "fail" to do dem?
"First of all, my thinking be say, instead of di fọma President to answer dis question, na di Party, di All Progressives Congress, APC go fit yan well. If dem no do am, we go talk wetin we go talk.
"Secondly, we dey always aware say, with Tinubu/Shettima presidency wey dey ground now and for which we get "New Sheriff in Town,"
"We no wan dey distract dem from di serious tins wey dey face dem and di nation. We no wan carry di shine comot from dem for any kain way.
"For di timing of di decisions to remove fuel subsidy and unify di currency, di Tinubu/Shettima administration don do well-well. Even more important, dem don show skill as dem manage di aftamath of di decisions, dem don avoid any wahala.
"Based on dis, our prayer and hope na say, our fellow country pipo go continue to support di new leadership for dis good good decisions wey dem don take, and especially, make di labour leaders and civil society work with dem to ensure say di palliative measures wey dem promise dey succesful.
"Di decision to remove subsidies, as e happun for our own case - and we believe say for evri oda situation - no be only di President suppose dey take am alone."