Commissioner for Women and Social Welfare for di state, Ify Obinabo, yarn tori pipo for Awka say dem arrest Ms Ifesinachi based on informate dem get.
Obinabo say di suspect wey come from Alor for Idemili South Local Government Area of di state, flog di girl wit cane and pestle and injure am well-well sake of di pikin throw her own pikin for ground.
She say dem don carry di matter go di State Criminal and Investigation Department for police for Anambra, wey go carry di suspect go court.
"As dem tell me di tori, I quickly send our response teams and some NGOs for company of police to go arrest di person wey do di bad tin. We don carry di little girl go hospital, and she dey undergo medical treatment to find out di extent of her wound. She dey safe now and no go go back to di house wey she dey live," Obinabo talk.
Di commissioner come tell families and guardians to stop to abuse and maltreat dia children and house help for di state. She come talk say anybody wey abuse any pikin for Anambra go feel di full weight of di law.
Ms Ifesinachi, while dey beg for mercy, confess say she flog di girl and injure am, and she come blame devil for her actions.
Parents of di pikin no wan reveal dia identity, but dem talk say dem send dia daughter go live wit di woman make she help am after she born twins for March.
Source: Prime 9ja Online Pidgin: Woman wey flog house help with cane, pestle land for prison