E talk say, "I don old small, e no fit pass me to sitdown dey look Nigeria leaders dey lead us go dysfunction. Now na all efforts we need from all di patriots wey don dey committed to rescue di nation from di precipice. And when I look di audience, I sabi say some of una fit do am and una suppose do am."
Obasanjo say di conduct of di last election don show say di kontri dey even more divided pass wetin we tink and e advise di next government to quickly find solution wey go make di youths happy and bring peace come back to di kontri.
"E go hard for di administration wey go take over after dis one, to quickly facilitate di process of national moral rearmament and national reconciliation to appease di aggrieved and bring peace to Nigeria. Dis na di necessary things wey go help us correct di sickening and painful show of shame wey di 2023 elections produce," Obasanjo explain.
Di former president say e dey e duty to always write letter wey go help Nigeria go di right direction and make life better for all Nigerian people.
"E don become my personal obligation, to dey write letter to push Nigeria in di right direction wey go fit benefit all Nigerians. Wetin we dey expect na better society, wey go make all Nigerians to become wetin God plan for them to become."
Meanwhile, di book wey dem present for di event wey Obasanjo attend na di memoirs of Dr. Tunji Olaopa, wey be former Permanent Secretary and Director-General for National Institute for Policy and Strategic Studies (NIPSS), and na former President Obasanjo write di forward for di book.