Israel Adesanya don win back im middleweight title afta im knack im long-time bitter rival Alex Pereira with one massive knockout for UFC 287 wey happun for Miami, Florida. Adesanya, wey be 33 years, knack Pereira, wey be 35 years, with two right hand punches wey make Pereira fall yakata for ground. BBC talk am say dis victory be Adesanya way of paying back Pereira afta Pereira knack am three times.
Adesanya bin lose two times for kickboxing wey happun for 2016 and 2017, and anoda time for UFC 281 for November 2022. Na for dis im most recent fight, Pereira knack am for the fifth round and con win the title for inside octagon.
As Adesanya take win the fight, im talk say, "I hope every one of you fit feel this level of happiness for one time for your life. But guess wetin? You no go fit feel this level of happiness if you no go try get something for your life. If dem knack you down, if you no stand up, you no go fit get that resolve. Strengthen your mind and feel this level of happiness. I dey lucky to feel am again and again and again."
For the co-main event, Brazil's Gilbert Burns knack hometown favourite Jorge Masvidal by unanimous decision, and e come call for title fight with British welterweight champion, Leon Edwards. UFC president, Dana White don talk before say American Colby Covington go fight Edwards next, but if Burns knack one more person, e go put am for the title picture.
Burns talk say, "I be the only person for inside the whole UFC wey ready to fight anybody at any time."