Gunmen kill 3 people for Gowon Estate, Lagos

Unknown gunmen don kill three people for Gowon Estate for Ipaja area of Lagos state. Lagos state police command spokesperson, SP Benjamin Hundeyin, confirm di tori on Thursday say di incident happun for Wednesday around 11:35 p.m.

Mr Hundeyin yan say di Gowon Estate Police Division bin receive call from di Naval Block of di estate say some pipo bin shoot dem for 41 Road, Union Bank Block for di estate.

According to di image maker, two patrol teams come move to di scene, and di police wey come see say dem don carry di victims go Igando General Hospital.

“At di scene of di shooting, di police recover nine expended cartridges and one bunch of keys.

“At Igando General Hospital, one unknown male corpse na im dem recover and carry go Mainland General Hospital, Yaba for autopsy.

“Further information wey di police get na say two male corpses dem don carry am go house. One male survivor, Doba Ngoze, dey on admission for Lagos University Teaching Hospital, Idi-Araba,” Mr Hundeyin talk.

Di spokesperson come talk say di police don start investigation on di matter.

Source: Prime 9ja Online Pidgin: Gunmen kill 3 people for Gowon Estate, Lagos