From wetin we hear, di kasala happun for Sapaade bridge around 9:21am wen Toyota Sienna wey dem write BWR762PV and Mazda bus with number plate BDN18 LG get acciden.
According to wetin wey our tori pesin gather, e be like say di driver of di Sienna bus bin dey drive against traffic, come jam di Mazda bus and fire start.
Florence Okpe wey be di pesin wey dey tok for Federal Road Safety Corps (FRSC) confam di tori give newsmen for Abeokuta on Thursday.
She say a total of 27 people- 25 men, two women and one pikin- dey inside di kasala. Seven people die, 18 wound.
"Seven people die from di fire," she talk.
Okpe blame di kasala for "excessive speed and route violation on the part of the (driver of) sienna bus who followed one way and collided with the Mazda bus and unfortunately there was a fire outbreak."
She talk say dem don carry di wound pipul go Victory Hospital, Ogere and Idera Hospital, Sagamu for treatment while dem carry di pipo wey die go FOS Morgue for Ipara.
Okpe come talk say Ahmed Umar, wey be di sector commander, don dey tell motorists to dey careful as e take concern route violation and excessive speed. E come advise dem to drive with sense and consideration for oda pipul wey dey road.
Okpe come talk say Umar don tell di family of di victims say make dem contact FRSC Ogere for more information about di kasala.