INEC don talk say no be true say dem commot Igbo pipo name for ad hoc staff wey go work for di Lagos election wey dey happen on top Saturday. Dem Resident Electoral Commissioner for Lagos, Olusegun Agbaje, talk am for statement wey e release on Wednesday evening.
E talk say make pipo no listen to di fake news wey dey go around about say e commot South-South and Igbo pipo names for di election wey dey come.
“INEC, Lagos state, read with great surprise and concern on the social media in respect of the removal of all Igbos and South-South staff in Lagos state from participating as ad hoc staff in the state during the forthcoming Governorship and House of Assembly elections on March 18,” INEC talk.
INEC talk say dem never commot di names of any South-South or Igbo ad hoc staff for di election. E explain say dem engage 738 ad hoc staff (Collation Officers) for di Presidential and National Assembly Elections wey happun on February 25 for Lagos State, but dem go need only 427 collation officers for di election wey go happun on Saturday.
“Members of staff wey be Igbo and South-South, go still work as collation officers for di election wey go happun on Saturday,” INEC talk.
Dem add say di talk wey dem talk with “Obidients, Sanwo-Olu and Tinubu,” for telephone no happun at all. Dem talk say anybody wey get di tori about di time and day wen dem tok am, make dem tell di public.
“Make everybody avoid fake news, misinformation and disinformation, make INEC fit concentrate on di election wey go happun. Di commission go continue to dey practice equity, fairness, transparency, credibility and accountability,” Agbaje talk.
Some pipo bin talk say INEC don remove all Igbo and South-South pipo wey go work for di March 18 election for Lagos.