Presido Muhammadu Buhari don sign 16 Constitutional Amendment bills into law. Some of the bills wey him sign include di one wey make am mandatory for Presido-elect and Govonor-elect to submit di names of ministers and commissioners to di Senate and state House of Assembly within 60 days of taking oath of office.
Di other bills wey him sign into law na to give financial independence to state Houses of Assembly and state judiciary, to remove railway, prison and electricity from exclusive legislative list to the concurrent list.
As dem sign am, na to publish am for di Official Gazette of di Federal Republic of Nigeria.
Some of di bills wey dem sign na to correct di name of Atigbo Local Government Area, di name of Obia/Akpor Local Government Area and also to delete reference to di provisions of di Criminal Code, Penal Code, Criminal Procedure Act, Criminal Procedure Code or Evidence Act.
Also, dem sign di bill to exclude di period of intervening events wen dem compute time to determine pre-election petitions, election petitions and appeals.
Di bill wey allow states to generate, transmit and distribute electricity for areas wen di national grid cover also dey among di ones wey dem sign.
Buhari also sign 3 other bills: The Nigerian Institute of Leather and Science Technology Act, The Nigerian Institute of International Relations Act, and The Federal Medical Centers (Amendment) Acts.
For 2015, when Buhari bin become presido, pipo bin dey vex as him no appoint ministers for six months. But President-Elect Bola Tinubu don tok say him go appoint competent pipo from across di kontri.